Моления о без вести сущих

Дополнительные прошения на ектении

Еще́ мо́лимся Тебе́, Го́споду и Бо́гу на́шему, о рабе́х Бо́жиих, [имярек], без ве́сти су́щих, и о е́же изба́вити их от вся́каго наве́та вра́жия и наси́лия лю́таго, сохраня́юще их в крове́ бла́гости Твоея́, мо́лим Ти ся, услы́ши и поми́луй.

Еще́ мо́лимся о е́же прости́ти им вся прегреше́ния во́льная и нево́льная, и яви́ти на них вели́кую Твою́ ми́лость, Христе́ Бо́же, ра́дость сре́тения с бли́жними неизрече́нную им да́рующе, мо́лим Ти ся, услы́ши и поми́луй.

Еще́ мо́лимся упова́нию на́шему не посра́млену бы́ти, во е́же не умре́ти рабо́м Бо́жиим, [имярек], но ми́рно в до́мы своя́ возврати́тися им, сро́дникам во утеше́ние, наипа́че же к сла́ве И́мене Твоего́, Го́споди, мо́лим Ти ся, услы́ши и поми́луй.

Молитва

Влады́ко, Го́споди Бо́же наш, всем челове́ком хотя́й спасти́ся и в позна́ние и́стины приити́! Не отврати́ лица́ Твоего́ от припа́дающих к Тебе́ в ско́рби и печа́ли, но ми́лостивно услы́ши вопль рабо́в Твои́х, пла́чущих о бли́жних [или: о ча́дех; или: о сро́дницех] свои́х, без ве́сти су́щих, и благода́тию ороси́ сердца́ моля́щихся, утеше́ние и ободре́ние им да́рующе.

Да бу́дет во́ля Твоя́, Бо́же, блага́я и всесоверше́нная.

А́ще жи́ви без ве́сти су́щии рабы́ Твои́, я́ко сы́ на, и́же изги́бл бе и обре́теся, я́ко заблу́ждшее овча́, обрети́ их, и к бли́жним возврати́, ра́дость ча́емую сре́тения да́рующе.

А́ще же сии́ тече́ние земно́е соверши́ша, в селе́ниях пра́ведных ве́чныя ду́ши их учини́, нас же научи смире́нно приима́ти сие́ промы́шление о них, скорбя́щия уте́ши и ра́дость с Небесе́ им низпосли́.

Твое́ бо есть е́же ми́ловати и спаса́ти ны, Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Молитва Пресвятой Богородице

О, Всесвята́я Влады́чице Богоро́дице, Взыска́ние поги́бших, стра́нных Пита́тельнице и заблу́ждших Путеводи́тельнице! Во́ина [имярек], о не́мже не и́мамы извеще́ния, покры́й честны́м Твои́м омофо́ром, сохрани́ от всех напа́стей вра́жиих, изба́ви плене́ния и лю́тыя сме́рти, от отча́яния огради́, да с благодаре́нием и любо́вию воспева́ет Твое́ тёплое заступле́ние. Ами́нь.

Последование молебного пения о сущих в скорбях и различных обстояниях

По обычном начале псалом избранный:

Го́споди, да не я́ростию Твое́ю обличи́ши мя́, ниже́ гне́вом Твои́м нака́жеши мя́, я́ко стре́лы Твои́ унзо́ша во мне́, и утверди́л еси́ на мне́ ру́ку Твою́. Несть исцеле́ния в пло́ти мое́й от лица́ гне́ва Твоего́, несть ми́ра в косте́х мои́х от лица́ грехо́в мои́х. Я́ко беззако́ния моя́ превзыдо́ша главу́ мою́, я́ко бре́мя тя́жкое отяготе́ша на мне́. Возсме́рдеша и согни́ша ра́ны моя́ от лица́ безу́мия моего́. Пострада́х и сляко́хся до конца́, весь день сету́я хожда́х. Озло́блен бых и смири́хся до зела́, рыка́х от воздыха́ния се́рдца моего́ (37/2–7, 9). Испо́лнися зол душа́ моя́ и жизнь моя́ а́ду прибли́жися (87/4). Душа́ моя́ смяте́ся (41/7), ско́рби се́рдца моего́ умно́жишася (24/17). Исчезе́ в боле́зни жизнь моя́, и ле́та моя́ в воздыха́ниях, изнемо́же нището́ю кре́пость моя́ и ко́сти моя́ смято́шася (30/11). На мне́ приидо́ша гне́ви Твои́, устраше́ния Твоя́ возмути́ша мя́ (87/17). Ре́х во исступле́нии мое́м: отве́ржен есмь от лица́ оче́й Твои́х (30/23). Вску́ю, Го́споди, отрее́ши ду́шу мою́, отвраща́еши лице́ Твое́ от мене́ (87/15)? Аз же на Тя́, Го́споди, упова́х, ре́х: Ты́ еси́ Бог мой. В рука́х Твои́х жреби́и мои́, изба́ви мя́ из ру́ки враго́в мои́х и от гоня́щих мя́. Просвети́ лице́ Твое́ на раба́ Твоего́, спаси́ мя́ ми́лостию Твое́ю. Го́споди, да не постыжу́ся я́ко призва́х Тя́ (30/15–18).

Сла́ва, и ны́не. Аллилу́ия (трижды).

На Бог Господь:

Тропарь, глас 1:

Спаси́, Го́споди, люде́й Твои́х и благослови́ достоя́ние Твое́, помоги́ тружда́ющимся и обремене́нным, уте́ши скорбя́щих и уныва́ющих и от всех бед сохрани́ рабо́в Твои́х. (Два́жды.)

Сла́ва, глас 8:

С вы́шних презира́яй, убо́гих приемля́й, посети́ нас грехо́в ра́ди на́ших беды́ и ско́рби терпя́щих, Влады́ко Всеми́лостиве, моли́твами Богоро́дицы и святы́х да́руй душа́м на́шим вели́ю ми́лость.

И ны́не, глас 2:

Всех скорбя́щих Ра́досте и оби́димых Засту́пнице, алчу́щих Пита́тельнице, стра́нников Руководи́тельнице и обурева́емых Приста́нище, не́мощных Покро́в и Засту́пнице, Жезл ста́рости, Ма́ти Бо́га и Вы́шнего, Ты́ еси́, Пречи́стая; потщи́ся, мо́лимся, спасти́ся рабо́м Твои́м.

Посе́м ино́й псало́м избра́нный:

Вску́ю приско́рбна еси́ душе́ моя́, и вску́ю смуща́еши мя́? Упова́й на Бо́га, я́ко испове́мся Ему́. Ре́ку Бо́гу: Засту́пник мой еси́, по́что мя́ забы́л еси́ и вску́ю сету́я хожду́ (41/6, 10). Ко Го́споду внегда́ ско́рблю, воззва́х (119/1). В день ско́рби мое́й Бо́га взыска́х рука́ми мои́ми (76/3). Из глубины́ воззва́х к Тебе́, Го́споди, Го́споди, услы́ши глас мой. Да бу́дут у́ши Твои́ внемлю́ще гла́су моле́ния моего́ (129/1–2). Бог нам Прибе́жище и Си́ла, По́мощник в ско́рбех, обре́тших нас зело́ (45/2). Услы́ши мя́, Го́споди, я́ко блага́ ми́лость Твоя́, по мно́жеству щедро́т Твои́х при́зри на мя́. Не отврати́ лица́ Твоего́ от о́трока Твоего́, я́ко ско́рблю, ско́ро услы́ши мя́, вонми́ души́ мое́й и изба́ви мя́ (68/17–19). Бо́же, в по́мощь мою́ вонми́, Го́споди, по́мощи ми потщи́ся (69/2). Сохрани́ ду́шу мою́ и изба́ви мя́, да не постыжу́ся, я́ко упова́х на Тя́ (24/20). На Тя́, Го́споди, упова́х, да не постыжу́ся в век (70/1).

Канон, глас 6:

Песнь 1

Ми́лостиве Го́споди, поми́луй рабо́в Твои́х, ми́лости ожида́ющих.

Пресвята́я Богоро́дице, спаси́ нас.

Святи́и А́нгели Храни́тели на́ши, моли́те Бо́га о нас.

Крести́телю Спа́сов Иоа́нне, моли́ Бо́га о нас.

Сла́ва, и ны́не.

Песнь 3

Ми́лостиве Го́споди, поми́луй рабо́в Твои́х, ми́лости ожида́ющих.

Свя́тый пра́ведный И́ове, моли́ Бо́га о нас.

Свя́тый проро́че Бо́жий Или́е, моли́ Бо́га о нас.

Свя́тый пра́ведный Симео́не, моли́ Бо́га о нас.

Сла́ва, и ны́не.

Катавасия:

По моли́твам святы́х Твои́х, Ми́лостиве, изба́ви от бед и ско́рбей рабо́в Твои́х, ми́лости ожида́ющих, я́ко мы усе́рдно к Тебе́ прибега́ем, к ми́лости Пода́телю и всех ско́рбных Уте́шителю.

Спаси́ от бед и ско́рбей рабо́в Твои́х, Пресвята́я Богоро́дице Де́во, я́ко мы все по Бо́зе к Тебе́ прибега́ем, я́ко к милосе́рдой Ма́тери на́шей и всех скорбя́щих Ра́дости.

Ектения сугубая:

Поми́луй нас Бо́же:

Е́ще мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии и оставле́нии грехо́в рабо́в Бо́жиих [имярек] и всех скорбя́щих и от зло́бы лю́дской терпя́щих.

Е́ще мо́лимся о бра́тиях на́ших на суди́щи, в те́мницах, у́зах, заточе́нии, изгна́нии и го́рьких рабо́тах су́щих.

Е́ще мо́лимся о врага́х на́ших, ненави́дящих и гоня́щих нас, и всех су́щих вне Правосла́вной Це́ркви и заблу́ждших.

Е́ще мо́лимся за всю бра́тию и за всех христиа́н.

Возгла́с: Я́ко ми́лостив:

Песнь 4

Ми́лостиве Го́споди, поми́луй рабо́в Твои́х, ми́лости ожида́ющих.

Свя́тый апо́столе Пе́тре, моли́ Бо́га о нас.

Свя́тый апо́столе Па́вле, моли́ Бо́га о нас.

Первому́чениче и архидиа́коне Стефа́не, моли́ Бо́га о нас.

Сла́ва, и ны́не.

Песнь 5

Ми́лостиве Го́споди, поми́луй рабо́в Твои́х, ми́лости ожида́ющих.

Священному́чениче Кли́менте, моли́ Бо́га о нас.

Святи́телю о́тче Афана́сие, моли́ Бо́га о нас.

Святи́телю о́тче Иоа́нне Златоу́сте, моли́ Бо́га о нас.

Сла́ва, и ны́не.

Песнь 6

Ми́лостиве Го́споди, поми́луй рабо́в Твои́х, ми́лости ожида́ющих.

Священному́чениче Кли́менте, моли́ Бо́га о нас.

Свята́я великому́ченице Анаста́сие, моли́ Бо́га о нас.

Священному́чениче Ермоге́не, моли́ Бо́га о нас.

Сла́ва, и ны́не.

Катавасия и ектения малая.

Прокимен, глас 4:

Го́споди, услы́ши моли́тву мою́ и вопль мой к Тебе́ да прии́дет.

Стих: Воньже а́ще день ско́рблю, приклони́ ко мне у́хо Твое́.

Евангелие от Матфея, зачало 43 от полу (11, 28–30).

Рече́ Госпо́дь: прииди́те ко Мне вси́ тружда́ющиися и обремене́ннии, и Аз упоко́ю вы. Возми́те и́го Мое́ на себе́, и научи́теся от Мене́, я́ко кро́ток есмь к смире́н се́рдцем: и обря́щете поко́й душа́м ва́шим. И́го бо Мое́ бла́го и бре́мя Мое́ легко́ есть.

Или Евангелие от Матфея, зач. 20 от полу (7, 7–11).

Рече́ Госпо́дь: проси́те, и да́стся вам; ищи́те, и обря́щете; толцы́те, и отве́рзется вам. Всяк бо прося́й прие́млет, и и́щай обрета́ет, и толку́щему отве́рзется. Или кто есть от вас челове́к, е́гоже а́ще вопро́сит сын его́ хле́ба, е́да ка́мень пода́ст ему? Или а́ще ры́бы про́сит, е́да зми́ю пода́ст ему? А́ще у́бо вы, лука́ви су́ще, уме́ете дая́ния блага́ дая́ти ча́дом ва́шим, кольми́ па́че Оте́ц ваш Небе́сный да́ст блага́ прося́щим у Него́.

Или от Марка, зач. 51 (11, 23–26).

Рече́ Госпо́дь Свои́м ученико́м: и́мейте ве́ру Бо́жию. Ами́нь бо глаго́лю вам, я́ко и́же а́ще рече́т го́ре сей, дви́гнися, и ве́рзися в мо́ре: и не размы́слит в се́рдце свое́м, но ве́ру и́мет, я́ко е́же глаго́лет, быва́ет: бу́дет ему́, е́же а́ще рече́т. Сего́ ра́ди глаго́лю вам: вся, ели́ка а́ще моля́щеся про́сите, ве́руйте, я́ко прие́млете: и бу́дет вам; и егда́ стои́те моля́щеся, отпуща́йте, а́ще что и́мате на ко́го: да и Оте́ц ваш, И́же есть на Небесе́х, отпу́стит вам согреше́ния ва́ша. А́ще ли же вы не отпуща́ете, ни Оте́ц ваш, И́же есть на Небесе́х, отпу́стит вам согреше́ний ва́ших.

Или от Луки, зач. 88 (18, 2–8).

Рече́ Госпо́дь при́тчу сию́: судия́ бе не́кий в не́коем гра́де, Бо́га не боя́ся, и челове́к не срамля́яся. Вдова́ же не́кая бе во гра́де том, и прихожда́еши к нему́, глаго́лющи: отмсти́ мене́ от сопе́рника моего́. И не хотя́ше на до́лзе вре́мени: после́ди же рече́ в себе́: а́ще и Бо́га не бою́ся, и челове́к не срамля́юся, но за́не твори́т им тру́ды вдови́ца сия́, отмщу́ ея́: да не до конца́ приходя́щи застои́т мене́. Рече́ же Госпо́дь: слы́шите, что судия́ непра́вды глаго́лет? Бог же не и́мать ли сотвори́ти отмще́ние избра́нных Свои́х, вопию́щих к Нему́ день и нощь, и долготерпя́ о них? Глаго́лю вам, я́ко сотвори́т отмще́ние их вско́ре.

Или от Луки, 2, 41–52.

Хожда́ста роди́теля Иису́совы на вся́ко ле́то во Иерусали́м в пра́здник па́схи. И егда́ бысть двоюнадеся́ти ле́ту, восходя́щым им во Иерусали́м по обы́чаю пра́здника, и сконча́вшым дни, и возвраща́ющимася и́ма, оста́ О́трок Иису́с во Иерусали́ме: и не разуме́ Ио́сиф и Ма́ти его́: мня́вша же его́ в дружи́не су́ща, преидо́ста дне путь, и иска́ста его́ во сро́дницех и в зна́емых: и не обре́тша его́, возврати́стася во Иерусали́м, взыска́юща его́. И бысть по триех днех, обрето́ста его́ в це́ркви, седя́щаго посреде́ учи́телей, и послуша́ющаго их, и вопроша́ющаго их: ужаса́хуся же вси́ послу́шающии его́ о ра́зуме и отве́тех его́. И ви́девша его́, диви́стася: и к нему́ Ма́ти его́ рече́: ча́до, что сотвори́ на́ма та́ко? се, оте́ц твой и аз боля́ща иска́хома тебе́. И рече́ к ни́ма: что я́ко иска́ста Мене́? не ве́ста ли, я́ко в тех, я́же Отца́ моего́, досто́ит бы́ти Ми? И та́ не разуме́ста глаго́лгола, е́гоже глаго́ла и́ма. И сни́де с ни́ма и прии́де в Назаре́т: и бе повину́яся и́ма. И Ма́ти Его́ соблюда́ше вся глаго́лголы сия́ в се́рдцы свое́м. И Иису́с преспева́ше прему́дростию и воз́растом и благода́тию у Бо́га и челове́к.

Песнь 7

Ми́лостиве Го́споди, поми́луй рабо́в Твои́х, ми́лости ожида́ющих,

Святи́телю о́тче Никола́е, моли́ Бо́га о нас.

Преподо́бная и благове́рная княги́ня А́нно, моли́ Бо́га о нас.

Преподо́бне и благове́рне кня́же Иоа́нне, моли́ Бо́га о нас.

Сла́ва, и ны́не.

Песнь 8

Ми́лостиве Го́споди, поми́луй рабо́в Твои́х ми́лости ожида́ющих.

Преподо́бне о́тче Пи́мене, моли́ Бо́га о нас.

Свя́тый великому́чениче Евста́фие, моли́ Бо́га о нас.

Преподо́бнии Ксенофо́нте и Мари́е, Иоа́нне и Арка́дие, моли́те Бо́га о нас.

Сла́ва, и ны́не.

Песнь 9

Ми́лостиве Го́споди, поми́луй рабо́в Твои́х, ми́лости ожида́ющих.

Святи́телю о́тче Иоа́нне, моли́ Бо́га о нас.

Свя́тый пра́ведный Филаре́те, моли́ Бо́га о нас.

Свята́я пра́ведная Иулиа́ние, моли́ Бо́га о нас.

Преподо́бне о́тче Сампсо́не, моли́ Бо́га о нас.

Преподо́бне о́тче Зо́тике, моли́ Бо́га о нас.

Сла́ва, и ны́не.

Досто́йно есть: Трисвято́е. О́тче наш:

Тропарь, глас 7:

Святи́и му́ченицы, до́бре страда́льчествовавшии к венча́вшиися, моли́теся ко Го́споду, поми́ловатися душа́м на́шим.

Сла́ва, и ны́не. Богоро́дичен, глас 5:

Утоли́ боле́зни многовоздыха́ющей души́ мое́й, утоли́вшая вся́ку сле́зу от лица́ земли́; Ты́ бо челове́ков боле́зни отгоня́еши и гре́шных ско́рби разруша́еши. Тебе́ бо вси́ стяжа́хом наде́жду и утвержде́ние, Пресвята́я Ма́ти Де́во.

Ектения сугубая:

Поми́луй нас Бо́же:

Е́ще мо́лимся Тебе́, Го́споду Бо́гу на́шему, о е́же поми́ловати всех скорбя́щих и от зло́бы лю́дской терпя́щих, и о е́же ми́лостиву и благоуве́тливу бы́ти к нам Тебе́, бла́гому и человеколюби́вому Бо́гу на́шему и поми́ловати нас.

Го́споди, поми́луй (15).

Е́ще мо́лимся и о е́же услы́шати:

Возгла́с: Услы́ши ны, Бо́же:

Молитва

Влады́ко Го́споди Иису́се Христе́ Бо́же наш, Бо́же вся́каго милосе́рдия и щедро́т, долготерпели́вый и многоми́лостивый, лю́бящий пра́ведных и гре́шных ми́лующий. Ты́ ре́кл еси́ пречи́стыми Твои́ми усты́: прииди́те ко Мне вси́ тружда́ющиися и обремене́ннии, и Аз упоко́ю вы. Се мы, гре́шные и недосто́йные, в ско́рбех и беда́х изнемога́ющии, к Тебе́ притека́ем и припа́дающе мо́лим: вонми́ предста́тельству о нас рождьшей Тя Богома́тери, приими́ моли́твы святы́х Твои́х, снизойди́ к на́шим не́мощам и яви́ ми́лость лю́дем Твои́м в ра́зличных обстоя́ниях су́щим и на Твое́ человеколю́бие упова́ющим: скорбя́щих уте́ши, уныва́ющих ободри́, осла́бевших укрепи́, больны́х исцели́, изуве́ченным и рассла́бленным терпе́ние посли́, гла́дных напита́й, наги́х оде́й, безприю́тным прию́т да́руй, тружда́ющимся помо́ги, обремене́нным забо́тами жите́йскими и тя́жкими тру́дами облегче́ние пода́ждь, на суди́лищах, в те́мницах, у́зах, заточе́нии, изгна́нии и го́рьких рабо́тах су́щих в терпе́нии укрепи́ и на свобо́ду ско́ро изведи́, на бра́ни су́щих сохрани́, пле́ненных возврати́, разлу́ченных соедини́, враждую́щих примири́, всем во всем ми́лость яви́ и всех Це́ркви Твое́й Свято́й предста́ви благоугожда́ющими. Тебе́ бо свой́ственно есть ми́ловати и спаса́ти нас, Го́споди Бо́же наш, и Тебе́ сла́ву возсыла́ем со Безнача́льным Твои́м Отце́м и Святы́м Ду́хом, ны́не и при́сно и во ве́ки веко́в. Ами́нь.

Отпуст:

Христо́с и́стинный Бог наш, моли́твами Пречи́стыя Своея́ Ма́тери, предста́тельством святы́х А́нгелов Храни́телей на́ших, святы́х сла́вных и всехва́льных апо́столов, святы́х сла́вных и добропобе́дных му́чеников и всех святы́х, поми́лует и спасе́т нас, я́ко Благ и Человеколю́бец.

Лик: Го́споди, поми́луй (трижды).